കൂളിമാട്: സംസ്ഥാന സർക്കാറിന്റെ ലഹരിവിരുദ്ധ പ്രവർത്തനങ്ങളുടെ ഭാഗമായി നടപ്പാക്കുന്ന ‘ഓപ്പറേഷൻ തൂഫാൻ’ പദ്ധതിക്ക് പിന്തുണ പ്രഖ്യാപിച്ച് അക്ഷര കൂളിമാട് സംഘടിപ്പിക്കുന്ന ‘അക്ഷര തൂഫാൻ തണ്ടർ ഡ്രൈവ്’ ക്യാമ്പയിന്റെ ഭാഗമായി കൂളിമാട് പാലത്തിന് താഴെയുള്ള പാർക്ക് പരിസരത്ത് എക്സൈസ് ഡിപ്പാർട്ട്മെന്റ് റിലാക്സ് സെന്റർ സ്ഥാപിക്കുന്നതിനുള്ള നടപടികൾക്ക് തുടക്കമായി.
ക്യാമ്പയിന്റെ ഭാഗമായി അക്ഷര കൂളിമാട് ഭാരവാഹികൾ സെക്രട്ടറി അലിയുടെ നേതൃത്വത്തിൽ ജില്ലാ പഞ്ചായത്ത് പ്രസിഡന്റിനെയും എക്സൈസ് ഡെപ്യൂട്ടി കമ്മീഷണർ ജിമ്മി ജോസഫിനെയും നേരിൽ കണ്ട് പിന്തുണ അഭ്യർത്ഥിച്ചിരുന്നു. ഇതിന് പിന്നാലെയാണ് എക്സൈസ് ഡിപ്പാർട്ട്മെന്റ് ഉദ്യോഗസ്ഥർ കൂളിമാട് പാലം പരിസരം സന്ദർശിച്ചത്.
ഡെപ്യൂട്ടി എക്സൈസ് കമ്മീഷണർ ജിമ്മി ജോസഫിന്റെ നിർദ്ദേശപ്രകാരം സന്തോഷ് ചെറുകോട് (അസിസ്റ്റന്റ് എക്സൈസ് ഇൻസ്പെക്ടർ, കോഴിക്കോട്), ഡോ. ജിതേഷ് (എക്സൈസ് വിമുക്തി ജില്ലാ കോഡിനേറ്റർ), സുജിത്ത് എൻ. (എക്സൈസ് പ്രിവന്റീവ് ഓഫീസർ, കുന്നമംഗലം എക്സൈസ് റേഞ്ച്), മുബഷിർ വി.പി. (എക്സൈസ് സിവിൽ ഓഫീസർ, കുന്നമംഗലം) എന്നിവരടങ്ങിയ സംഘമാണ് കൂളിമാട് പാലത്തിന് താഴെയുള്ള പാർക്ക് പരിസരം സന്ദർശിച്ചത്.
*ജനങ്ങൾക്ക് ആശ്രയിക്കാവുന്ന കേന്ദ്രം*
കൂളിമാട് പാലത്തിന് താഴെയുള്ള പ്രദേശത്ത് എക്സൈസ് ഡിപ്പാർട്ട്മെന്റ് റിലാക്സ് സെന്റർ സ്ഥാപിക്കുന്നതുമായി ബന്ധപ്പെട്ട് ഉദ്യോഗസ്ഥർ അക്ഷര കൂളിമാട് ഭാരവാഹികളുമായി വിശദമായ ചർച്ച നടത്തി. വിവിധ ലഹരി സംബന്ധമായ പ്രശ്നങ്ങളിൽ ജനങ്ങൾക്ക് ആശ്രയിക്കാവുന്ന കേന്ദ്രമായും ലഹരിവിരുദ്ധ ബോധവൽക്കരണ പ്രവർത്തനങ്ങൾക്കും വിവിധ സേവനങ്ങൾക്കും സൗകര്യമൊരുക്കുന്ന ഇടമായും റിലാക്സ് സെന്ററിനെ വികസിപ്പിക്കാനാണ് ലക്ഷ്യമിടുന്നതെന്ന് ഉദ്യോഗസ്ഥർ അറിയിച്ചു.
പ്രദേശത്തെ യുവാക്കളെയും പൊതുജനങ്ങളെയും ലഹരിക്കെതിരായ പ്രവർത്തനങ്ങളിൽ കൂടുതൽ സജീവമായി പങ്കാളികളാക്കുന്നതിനും ആവശ്യമായ സഹായങ്ങളും മാർഗനിർദേശങ്ങളും ലഭ്യമാക്കുന്നതിനും ഇത്തരം ഒരു കേന്ദ്രം സഹായകരമാകുമെന്നാണ് പ്രതീക്ഷ.
*കൂളിമാട് പാർക്ക് ഇനി എക്സൈസ് നിരീക്ഷണത്തിൽ*
കൂളിമാട് പാർക്കും പാലത്തിന് താഴെയുള്ള പരിസരപ്രദേശങ്ങളും എക്സൈസ് ഡിപ്പാർട്ട്മെന്റിന്റെ സജീവ നിരീക്ഷണത്തിൽ ആയിരിക്കുമെന്ന് ഉദ്യോഗസ്ഥർ അക്ഷര കൂളിമാട് ഭാരവാഹികൾക്ക് ഉറപ്പ് നൽകി.
പ്രദേശത്ത് ലഹരി ഉപയോഗവുമായി ബന്ധപ്പെട്ട പ്രശ്നങ്ങൾ ഉണ്ടാകുന്നത് തടയുന്നതിനും ഇത്തരം പ്രവർത്തനങ്ങൾ ശ്രദ്ധയിൽപ്പെട്ടാൽ ആവശ്യമായ നടപടികൾ സ്വീകരിക്കുന്നതിനും എക്സൈസിന്റെ നിരീക്ഷണം സഹായകമാകും. പൊതുജനങ്ങൾക്ക് സുരക്ഷിതമായ അന്തരീക്ഷം ഉറപ്പാക്കുന്നതിനും പാർക്ക് ഉൾപ്പെടെയുള്ള പൊതുസ്ഥലങ്ങൾ കൂടുതൽ ഫലപ്രദമായി ഉപയോഗപ്പെടുത്തുന്നതിനും നടപടികൾ സഹായിക്കുമെന്നാണ് വിലയിരുത്തൽ.
*എംഎൽഎയുമായും മുതിർന്ന ഉദ്യോഗസ്ഥരുമായും ചർച്ച*
റിലാക്സ് സെന്റർ സ്ഥാപിക്കുന്നതുമായി ബന്ധപ്പെട്ട കൂടുതൽ കാര്യങ്ങൾ സ്ഥലം എംഎൽഎയുമായും മറ്റ് മുതിർന്ന ഉദ്യോഗസ്ഥരുമായും ആലോചിച്ച് തീരുമാനിക്കുമെന്ന് എക്സൈസ് ഉദ്യോഗസ്ഥർ അറിയിച്ചു.
ഇതിനായി കൂളിമാട് പാലം ഭാഗത്ത് വീണ്ടും വിശദമായ സന്ദർശനം നടത്തുകയും സ്ഥലത്തിന്റെ സാഹചര്യങ്ങൾ വിലയിരുത്തി തുടർനടപടികൾ തീരുമാനിക്കുകയും ചെയ്യും. സെന്ററിന്റെ പ്രവർത്തനം, ആവശ്യമായ സൗകര്യങ്ങൾ, ലഹരിവിരുദ്ധ ബോധവൽക്കരണ പ്രവർത്തനങ്ങൾ തുടങ്ങിയ കാര്യങ്ങളിൽ തുടർചർച്ചകൾ നടത്താനും തീരുമാനിച്ചിട്ടുണ്ട്.
അക്ഷര തൂഫാൻ തണ്ടർ ഡ്രൈവ് ക്യാമ്പയിന്റെ ഭാഗമായി പ്രദേശത്ത് ലഹരിക്കെതിരെ ശക്തമായ സാമൂഹിക ഇടപെടൽ നടത്തുന്നതിനുള്ള ശ്രമങ്ങൾക്കാണ് ഇതോടെ കൂടുതൽ പിന്തുണ ലഭിക്കുന്നത്.
മൂന്നു പതിറ്റാണ്ടുകൾക്ക് മുമ്പ് പുകവലിയെ പുകച്ച് പുറത്തുചാടിച്ച കൂളിമാടിന് നേതൃത്വം കൊടുത്ത സാംസ്കാരിക സംഘടനയായ അക്ഷര കൂളിമാടിന്റെ 'ലഹരിയും പുകവലിയും ഇല്ലാത്ത സൽക്കാരങ്ങളുടെ നാടായ കൂളിമാട്' എന്ന ലക്ഷ്യത്തിലേക്ക് പരിസരപ്രദേശത്തുകാരുടെയും പിന്തുണ ഉറപ്പുവരുത്തുവാനും അതുമായി ബന്ധപ്പെട്ട കാര്യങ്ങൾ നടപ്പിലാക്കുന്നതിനു വേണ്ടി ഒത്തൊരുമിച്ച് നിൽക്കാനും എക്സൈസ് ഡിപ്പാർട്ട്മെന്റിന്റെ സജീവ സഹകരണത്തോടെ കൂളിമാട് മേഖലയെ ലഹരിവിരുദ്ധ പ്രവർത്തനങ്ങളുടെ ശ്രദ്ധേയമായ കേന്ദ്രമാക്കി മാറ്റാനുമാണ് ഈ ക്യാമ്പയിൻ ലക്ഷ്യമിടുന്നതെന്ന് അക്ഷര കൂളിമാട് ഭാരവാഹികൾ അറിയിച്ചു.
ചാത്തമംഗലം ഗ്രാമപഞ്ചായത്ത് മെമ്പർ സ്മിജ, അക്ഷര പ്രസിഡണ്ട് ഇ കെ നസീർ, സെക്രട്ടറി അലി c, അക്ഷര തൂഫാൻ തണ്ടർ ഡ്രൈവ് കൺവീനർ കെടിഎ നാസർ, നജ്മുൽ ഹുദ കെ സി, സാദിഖ് അറളയിൽ, ജിയാദ് തുടങ്ങിയവരും ചർച്ചയിൽ പങ്കെടുത്തു.
Post a Comment