മാവൂര്: കോഴിക്കോട് -ഊട്ടി ഹ്രസ്വദൂര പാതയുടെ ഭാഗമായ എളമരംകടവ്-കൂളിമാട്-പന്നിക്കോട്-എരഞ്ഞിമാവ് റോഡ് നവീകരണത്തിന് സാങ്കേതികാനുമതിയായി
സംസ്ഥാന സര്ക്കാറിന്റെ മെയിന്റനന്സ് പ്ലാന് ഫണ്ടില് ഉള്പ്പെടുത്തിയാണ് പ്രവൃത്തി. 6.900 കി. മീറ്റര് നവീകരണത്തിന് ആറ് കോടി രൂപയാണ് അനുവദിച്ചത്. ബി.എം, ബി.സി നിലവാരത്തിലുള്ള ടാറിങ്, ആവശ്യമുള്ളയിടങ്ങളില് ഓവുചാല് നിര്മാണം, ഇന്റര്ലോക്ക് തുടങ്ങിയവയാണ് പദ്ധതിയുടെ ഭാഗമായി നടക്കുക. എത്രയും പെട്ടെന്ന് ടെന്ഡര് നടപടി പൂര്ത്തിയാക്കി പ്രവൃത്തി ആരംഭിക്കും.
മാവൂര് മുതല് എളമരം കടവ് വരെയുള്ള ഭാഗം എളമരം പാലത്തിന്റെ പ്രവൃത്തിയുടെ ഭാഗമായി നവീകരിക്കുന്നുണ്ട്. എളമരംകടവ് മുതല് കൂളിമാട് വരെ പലഭാഗത്തും നിലവില് വീതി കുറവാണ്. ഈ ഭാഗം വീതികൂട്ടുന്നത് പദ്ധതിയിലുള്പ്പെടുത്തിയിട്ടില്ല.
വീതി കൂട്ടുന്നതിന് മറ്റൊരു പദ്ധതിക്കായി നിര്ദേശം നല്കിയിട്ടുണ്ട്. ഇതിന്റെ നടപടി പുരോഗമിക്കുകയാണെന്ന് പി.ടി.എ. റഹീം എം.എല്.എയുടെ ഓഫിസില്നിന്ന് അറിയിച്ചു
Post a Comment