തിരുവനന്തപുരം: മെസ്സി വിവാദത്തില് പ്രത്യേക അന്വേഷണ സംഘത്തെ (എസ്ഐടി) പ്രഖ്യാപിച്ച് സര്ക്കാര്. എഡിജിപി പി. വിജയന്റെ നേതൃത്വത്തിലുള്ള സംഘത്തിനാണ് അന്വേഷണത്തിന്റെ ചുമതല. വിശദമായ അന്വേഷണം നടത്തി വേഗത്തില് റിപ്പോര്ട്ട് സമര്പ്പിക്കാനാണ് നിര്ദേശം നല്കിയിരിക്കുന്നതെന്ന് ആഭ്യന്തരമന്ത്രി രമേശ് ചെന്നിത്തല പറഞ്ഞു. നിയമോപദേശത്തിന്റെയും മുഖ്യമന്ത്രിയുടെ കുറിപ്പിന്റെയും അടിസ്ഥാനത്തിലാണ് അന്വേഷണ സംഘത്തെ നിയമിച്ചത്. എസ്പി, ഡിവൈഎസ്പി എന്നിവരടങ്ങുന്ന സംഘമാണ് അന്വേഷണം നടത്തുക.
ക്രൈംബ്രാഞ്ച്, വിജിലന്സ് ഉദ്യോഗസ്ഥരും ഈ സംഘത്തിലുണ്ടാകും. കൂടുതല് ഉദ്യോഗസ്ഥരെ പിന്നീട് പ്രഖ്യാപിക്കും. ഇതുസംബന്ധിച്ച ഉത്തരവ് ഇന്ന് വൈകീട്ട് പുറത്തിറക്കുമെന്നും മന്ത്രി പറഞ്ഞു.
റിപ്പോര്ട്ടര് ബ്രോഡ്കാസ്റ്റിങ് കമ്പനിയുമായി ബന്ധപ്പെട്ട് ഉയര്ന്ന വിവാദങ്ങളിലാണ് സര്ക്കാരിന്റെ നടപടി. കള്ളപ്പണ ഇടപാട്, സര്ക്കാര് നടപടികളിലെ വീഴ്ച ഉള്പ്പെടെ എസ്ഐടി അന്വേഷിക്കും. ജിഎസ്ടി വിഭാഗം നടത്തിയ അന്വേഷണത്തില് ഗുരുതരമായ ക്രമക്കേടുകളാണ് കണ്ടെത്തിയിരുന്നത്. മെസ്സിയെയും ടീമിനെയും കേരളത്തിലെത്തിക്കുമെന്ന് പ്രഖ്യാപിച്ചതിന് പിന്നാലെ അര്ജന്റീനിയന് ഫുട്ബോള് അസോസിയേഷനുമായി നടത്തിയ സാമ്പത്തിക കരാറുകള്, പണം കൈമാറ്റം എന്നിവയുമായി ബന്ധപ്പെട്ട് വന് തട്ടിപ്പ് നടന്നതായാണ് പ്രാഥമിക കണ്ടെത്തല്. ഈ അന്വേഷണത്തില് ജിഎസ്ടി വെട്ടിപ്പ് ഉള്പ്പെടെ കണ്ടെത്തിയിരുന്നു. ഇതിനുപുറമെ വിദേശ നാണയ വിനിമയ ചട്ടം (FEMA) ചുമത്താന് പര്യാപ്തമായ സാമ്പത്തിക കുറ്റകൃത്യങ്ങള് നടന്നിട്ടുണ്ടെന്ന നിയമോപദേശവും സര്ക്കാരിന് ലഭിച്ചിരുന്നു. ഇതിന്റെ അടിസ്ഥാനത്തിലാണ് വിഷയത്തില് മുഖ്യമന്ത്രി അടിയന്തരമായി ഇടപെട്ടത്._
Post a Comment