കാരന്തൂർ: പുറത്ത് തോരാതെ പെയ്യുന്ന മഴ സൃഷ്ടിച്ച ആശങ്കകൾക്കിടയിലും ആ കൊച്ചുകൂട്ടുകാരുടെ മുഖത്ത് പെട്ടെന്നാണ് സന്തോഷത്തിന്റെ വെളിച്ചം പടർന്നത്. കാരന്തൂർ എൽ.പി സ്കൂളിൽ പ്രവർത്തിക്കുന്ന ദുരിതശ്വാസ ക്യാമ്പിൽ അപ്രതീക്ഷിതമായി എത്തിയ ജനപ്രതിനിധിയുടെ സ്നേഹത്തലോടൽ, ക്യാമ്പിലെ ദുരിതക്കാഴ്ചകൾക്കിടയിൽ വേറിട്ടൊരു ആശ്വാസനിമിഷമായി.
ക്യാമ്പിലെ സൗകര്യങ്ങൾ വിലയിരുത്താനും ദുരിതബാധിതരെ ആശ്വസിപ്പിക്കാനുമാണ് എം. എ. റസാക്ക് മാസ്റ്റർ എം.എൽ.എ എത്തിയത്. മുതിർന്നവരുടെ സങ്കടങ്ങൾ കേട്ട് ആശ്വസിപ്പിക്കുന്നതിനിടയിലാണ് ക്യാമ്പിലെ കൊച്ചുമക്കളായ ഹനാൻഷയിലേക്കും ലമീൻ യമാനിലേക്കും അദ്ദേഹത്തിന്റെ ശ്രദ്ധ തിരിഞ്ഞത്.
ക്യാമ്പിലെ അടച്ചിട്ട മുറികളുടെ അന്യത മറന്ന് ചുറ്റും കൂടിയ കുട്ടികളെ അദ്ദേഹം സ്നേഹത്തോടെ ചേർത്തുവെച്ചു. കൈയിൽ കരുതിയ മധുരപലഹാരം കൊച്ചു ലമീൻ യമാന് അദ്ദേഹം നൽകിയപ്പോൾ, ഹനാൻഷ ഉൾപ്പെടെയുള്ള ചുറ്റും നിന്ന കുരുന്നുകളുടെ മുഖത്ത് കൗതുകവും സന്തോഷവും തിളങ്ങി.
വീടുകളിൽ വെള്ളം കയറിയതിന്റെ സങ്കടങ്ങളും പ്രയാസങ്ങളും പേറി കഴിയുന്ന കുടുംബങ്ങൾക്ക് ഇത്തരം കുഞ്ഞു സന്തോഷങ്ങളാണ് അതിജീവനത്തിന് കരുത്താകുന്നത്. ഔദ്യോഗികമായ സന്ദർശനങ്ങൾക്കപ്പുറം, ദുരന്തമുഖത്ത് മനുഷ്യബന്ധങ്ങളുടെയും കരുതലിന്റെയും നന്മയോർമ്മിപ്പിക്കുന്നതായിരുന്നു ക്യാമ്പിലെ ഈ കൊച്ചു കാഴ്ച.
സന്നദ്ധ പ്രവർത്തകരും ക്യാമ്പ് അധികൃതരും ചേർന്ന് ദുരിതബാധിതർക്ക് ആവശ്യമായ എല്ലാ സൗകര്യങ്ങളും സ്കൂളിൽ ഉറപ്പുവരുത്തുന്നുണ്ട്.
Post a Comment