100 ​ഗോൾ; അന്താരാഷ്‌ട്ര ഫുട്ബോളിൽ ചരിത്ര നേട്ടം കുറിച്ച് ലയണൽ മെസി

ബ്യൂണസ് അയേഴ്‌സ്: അന്താരാഷ്‌ട്ര മത്സരത്തില്‍ നൂറു ​ഗോൾ തികച്ച് സൂപ്പർ താരം ലയണല്‍ മെസ്സി. ബുധനാഴ്ച പുലർച്ചെ കുറസാവോയ്‌ക്കെതിരെയായിരുന്നു മെസ്സിയുടെ നൂറാം ​ഗോൾ. മത്സരത്തിന്റെ 20-ാം മിനുട്ടിലായിരുന്നു ​ഗോൾ വല ചലിപ്പിച്ച് മെസ്സി തന്റെ അന്താരാഷ്‌ട്ര ഫുട്ബോളിലെ സെഞ്ച്വറി ​ഗോൾ സ്വന്തമാക്കിയത്. തന്റെ 174-ാമത്തെ മത്സരത്തിലാണ് മെസ്സി ചരിത്ര നേട്ടം കുറിച്ചത്

മത്സരത്തില്‍ കുറസാവോയെ അര്‍ജന്റീന എതിരില്ലാത്ത ഏഴു ഗോളുകള്‍ക്കാണ് തോൽപ്പിച്ചത്. കളിയിൽ മെസ്സി ഹാട്രിക് നേടി. 23-ാം മിനുട്ടില്‍ നിക്കോ ഗോണ്‍സാല്‍വസ് ലീഡുയര്‍ത്തി. 33-ാം മിനുട്ടില്‍ വീണ്ടും മെസ്സിയുടെ തകര്‍പ്പന്‍ ഗോള്‍. 35-ാം മിനുട്ടില്‍ എന്‍സോ ഫെര്‍മാണ്ടസിലൂടെ അര്‍ജന്റീന വീണ്ടും ലീഡുയര്‍ത്തി. 37-ാം മിനുട്ടില്‍ മെസ്സി മൂന്നാം ഗോളും നേടി അര്‍ജന്റീനന്‍ ഗോള്‍പട്ടിക തികച്ചു. കുറസാവോക്കെതിരേ ബുധനാഴ്ച പുലർച്ചെ 5.30-ന് അർജന്റീനയിലെ സാന്റിയാഗോയിലായിരുന്നു മത്സരം.

2005 മുതലാണ് മെസ്സി അർജന്റീനയുടെ സീനിയർ ടീമിൽ കളിച്ച് തുടങ്ങിയത്. 2004-ൽ അണ്ടർ 20 ടീമിലും കളിച്ചിരുന്നു. 2006 മുതൽ 2022 വരെ അഞ്ച് ഫുട്‌ബോൾ ലോകകപ്പിലും പങ്കെടുത്തു. 2005 ഓഗസ്റ്റ് 17-ന് ഹംഗറിക്കെതിരേയാണ് മെസ്സി ആദ്യമായി കളിച്ചത്. 2006 മാർച്ച് ഒന്നിന് ക്രൊയേഷ്യക്കെതിരേയുള്ള മത്സരത്തിൽ താരം ആദ്യ അന്താരാഷ്‌ട്ര ഗോളും നേടി

ലോക ഫുട്ബോൾ ചരിത്രത്തിൽ നൂറ് ​ഗോൾ തികയ്‌ക്കുന്ന മൂന്നാമത്തെ താരമാണ് ലയണൽ മെസ്സി. ഒന്നാമത് പോർച്ചുഗലിന്റെ ക്രിസ്റ്റ്യാനോ റൊണാൾഡോയാണ്. 122 ​ഗോളുകളാണ് ക്രിസ്റ്റ്യാനോ ഇതുവരെ നേടിയത്. രണ്ടാമത് ഇറാന്റെ അലി ദേയിയാണ്. 109 ഗോളാണ് അലി ദേയി ഇതുവരെ സ്വന്തമാക്കിയിരിക്കുന്നത്