കുന്ദമംഗലം: നിയോജകമണ്ഡലത്തിലെ വിവിധ ഭാഗങ്ങളിൽ കനത്ത മഴയെത്തുടർന്ന് വെള്ളക്കെട്ട് രൂക്ഷമായ സാഹചര്യത്തിൽ അടിയന്തര മുൻകരുതൽ നടപടികൾ ഏകോപിപ്പിക്കുന്നതിനായി എം. എ. റസാഖ് മാസ്റ്റർ എം.എൽ.എയുടെ അധ്യക്ഷതയിൽ ജനപ്രതിനിധികളുടെയും വിവിധ വകുപ്പ് ഉദ്യോഗസ്ഥരുടെയും അടിയന്തര യോഗം ചേർന്നു.
മണ്ഡലത്തിലെ വിവിധ പ്രദേശങ്ങളിൽ വെള്ളം കയറിയതുമായി ബന്ധപ്പെട്ട നിലവിലെ സ്ഥിതിഗതികൾ യോഗം വിശദമായി വിലയിരുത്തി. അടിയന്തര സാഹചര്യങ്ങൾ കൈകാര്യം ചെയ്യുന്നതിനും ദുരന്തനിവാരണ പ്രവർത്തനങ്ങൾ ഊർജ്ജിതമാക്കുന്നതിനും യോഗത്തിൽ സമഗ്രമായ പദ്ധതികൾക്ക് രൂപം നൽകി. ഏതൊരു അടിയന്തര ഘട്ടത്തെയും നേരിടാൻ വിവിധ വകുപ്പുകൾ തമ്മിൽ കൃത്യമായ ഏകോപനം ഉറപ്പുവരുത്തണമെന്നും ഉദ്യോഗസ്ഥർ മുഴുവൻ സമയ ജാഗ്രത പാലിക്കണമെന്നും എം.എൽ.എ നിർദ്ദേശിച്ചു.
കുന്ദമംഗലം ബ്ലോക്ക് പഞ്ചായത്ത് പ്രസിഡന്റ് സി. കെ. ഫാസില യോഗത്തിന് സ്വാഗതം പറഞ്ഞു. എം. എ റസാഖ് മാസ്റ്റർ എം. എൽ. എ അധ്യക്ഷത വഹിച്ചു. വൈസ് പ്രസിഡന്റ് വിനോദ് പടനിലം നന്ദി രേഖപ്പെടുത്തി. മണ്ഡലത്തിലെ വിവിധ പഞ്ചായത്ത് പ്രസിഡന്റുമാർ, പഞ്ചായത്ത് സെക്രട്ടറിമാർ, വില്ലേജ് ഓഫീസർമാർ, ഫയർഫോഴ്സ്, പോലീസ്, കെ.എസ്.ഇ.ബി ഉദ്യോഗസ്ഥർ തുടങ്ങി വിവിധ വകുപ്പുകളിലെ ഉദ്യോഗസ്ഥരും ജനപ്രതിനിധികളും യോഗത്തിൽ പങ്കെടുത്തു.
മഴക്കാല കെടുതിയുമായി ബന്ധപ്പെട്ട് ജനങ്ങളെ സഹായിക്കുന്നതിനായി എം.എൽ.എ ഓഫീസ് കേന്ദ്രീകരിച്ച് പ്രത്യേക ഹെൽപ്പ് ഡെസ്ക് പ്രവർത്തനം ആരംഭിച്ചിട്ടുണ്ട്. അടിയന്തര ഘട്ടങ്ങളിൽ പൊതുജനങ്ങൾക്ക് ബന്ധപ്പെടാവുന്ന നമ്പർ : കോർഡിനേറ്റർ: 97472 03850, എം.എൽ.എ ഓഫീസ്: 9747022928
Post a Comment