മാവൂർ: പ്രശസ്ത ഗാനരചയിതാവ് ഗിരീഷ് പുത്തഞ്ചേരിയുടെ 16-ാം ചരമ വാർഷികത്തോടനുബന്ധിച്ച് ഓൾ കേരള വാർമുകിൽ മ്യൂസിക് ഫൗണ്ടേഷൻ്റെ നേതൃത്വത്തിൽ അനുസ്മരണ പരിപാടിയും പുരസ്കാര സമർപ്പണവും സംഘടിപ്പിച്ചു. 'പിന്നെയും പിന്നെയും ആരോ കിനാവിൽ' എന്ന പേരിൽ സംഘടിപ്പിച്ച ശ്രദ്ധാഞ്ജലിയിൽ സംഗീത ലോകത്തെ നിരവധി പ്രതിഭകൾ പങ്കെടുത്തു.
ചടങ്ങിൽ വെച്ച് ഫൗണ്ടേഷൻ ഏർപ്പെടുത്തിയ ഈ വർഷത്തെ എക്സലൻസ് അവാർഡുകൾ വിതരണം ചെയ്തു. മെലഡി മാവൂർ സിംഗിംഗ് സ്റ്റുഡിയോ സ്ഥാപക ഡയറക്ടർ കെ.ടി. മുരളീധരൻ, സുനിൽലാൽ, സെയ്ത് അബ്സൽ, സുലോചന മോഹൻ എന്നിവർ മുഖ്യാതിഥിയായ പിന്നണി ഗായിക സിന്ധു പ്രേംകുമാറിൽ നിന്നും പുരസ്കാരങ്ങൾ ഏറ്റുവാങ്ങി.
ഫൗണ്ടേഷൻ ചെയർമാൻ എ.വി. റഷീദ് അലി അനുസ്മരണ പ്രഭാഷണം നടത്തി. ഗിരീഷ് പുത്തഞ്ചേരിയുടെ അനശ്വരമായ ചലച്ചിത്ര ഗാനങ്ങൾ കോർത്തിണക്കി നടത്തിയ സംഗീതാർച്ചനയിൽ 36 ഗായകർ അദ്ദേഹത്തിന്റെ വിവിധ ഗാനങ്ങൾ ആലപിച്ചു. ശരത് കുമാർ ചടങ്ങിൽ അധ്യക്ഷത വഹിച്ചു.
സാംസ്കാരിക പ്രവർത്തകരായ മോഹൻ മുല്ലമല, കെ.പി. മുഹമ്മദ് അസ്ലം എന്നിവർ സംസാരിച്ചു. രമ്യ അരവിന്ദ് സ്വാഗതവും നസീമ റിഹാസ് നന്ദിയും പറഞ്ഞു.
Post a Comment