കുന്ദമംഗലം : കുന്ദമംഗലം വിദ്യാഭ്യാസ ഉപജില്ലയുടെ ആഭിമുഖ്യത്തിൽ നടപ്പിലാക്കുന്ന കുഞ്ഞെഴുത്തിന്റെ മധുരം പദ്ധതിയുടെ ഭാഗമായി നിർമ്മിച്ച കയ്യെഴുത്ത് മാസിക പ്രദർശനവും, ഉപജില്ലാ വിദ്യാഭ്യാസ ഓഫീസർ കെ.ജെ പോൾ നുള്ള അറേബ്യൻ വേൾഡ് റെക്കോർഡ് വിതരണവും പി ടി എ റഹീം എം എൽ എ നിർവ്വഹിച്ചു. ബ്ലോക്ക് പഞ്ചായത്ത് പ്രസിഡന്റ് ടി പി മാധവൻ അധ്യക്ഷത വഹിച്ചു.
കുന്ദമംഗലം ഉപജില്ലയിലെ 41 ഓളം വരുന്ന വിദ്യാലയങ്ങളിലെ മുഴുവൻ കുട്ടികളെയും പങ്കെടുപ്പിച്ച് കൊണ്ട് നടപ്പിലാക്കുന്ന പദ്ധതിയാണ് കുഞ്ഞെഴുത്തിന്റെ മധുരം . കുട്ടികളുടെ കൈയ്യെഴുത്ത് പ്രോൽസാഹിപ്പിക്കുക, മറ്റ് സർഗ്ഗാത്മക കഴിവുകൾ പ്രോൽസാഹിപ്പിക്കുക, കുട്ടികളുടെ രചനാപരമായ കഴിവുകളും സർഗ്ഗാത്മകതയും തിരിച്ചറിഞ്ഞ് ദിശാബോധം നൽകുക, കുട്ടികൾക്ക് പ്രാവിണ്യമുള്ള മേഖലകളിൽ കൂടുതൽ അവസരങ്ങളൊരുക്കുക, കുട്ടികളുടെ മാനസിക സമ്മർദ്ദം ലഘൂകരിക്കുക എന്നിവയാണ് കുഞ്ഞെഴുത്തിന്റെ മധുരം പദ്ധതിയുടെ ലക്ഷ്യം. ഈ ആശയം നൽകിയതിനും നേതൃത്വത്തിനും ഏകോപനത്തിനുമാണ് കെ.ജെ പോളിന് അറേബ്യൻ വേൾഡ് റിക്കാർഡിന് അർഹനായത്. വളരെ ചുരുങ്ങിയ കാലത്തിനുള്ളിൽ മുവ്വായിരത്തി അഞ്ഞുറോളം കൈയ്യെഴുത്ത് മാസികൾ നിർമ്മിച്ചാണ് കുട്ടികൾ ചരിത്രനേട്ടം കൈവരിച്ചത്. ഈ മാഗസിൻ നിർമ്മാണത്തിലെ തിളർക്കമാർന്ന മുഹുർത്തങ്ങളും അനുഭവങ്ങളും ചേർത്ത് നിർമ്മിച്ച ഓർമ്മ പുസ്തകമായ മധുര സ്മൃതികളുടെ പ്രകാശനം കോഴിക്കോട് ഡയറ്റ് പ്രിൻസിപ്പൽ അബ്ദുൾ നാസറും പ്രതിഭകൾക്കുള്ള അനുമോദനം സാഹിത്യകാരി ആര്യാ ഗോപിയും നിർവഹിച്ചു. എച്ച് എം ഫോറം സെക്രട്ടറി സി.കെ വിനോദ് കുമാർ റിപ്പോർട്ട് അവതരിപ്പിച്ചു.
കുന്ദമംഗലം ഗ്രാമപഞ്ചായത്ത് പ്രസിഡന്റ് ലിജി പുൽകുന്നുമ്മൽ, ചാത്തമംഗലം ഗ്രാമപഞ്ചായത്ത് പ്രസിഡന്റ് ഒളിക്കൽ ഗഫൂർ, കുരുവട്ടൂർ ഗ്രാമപഞ്ചായത്ത് പ്രസിഡന്റ് സരിത കെ, എന്നിവർ റെക്കോർഡ് സർട്ടിഫിക്കറ്റുകൾ വിതരണം ചെയ്തു.
എച്ച് എം ഫോറം പ്രസിഡന്റ് റോഷ്മ ജി.എസ്, മുൻ അറേബ്യൻ വേൾഡ് റെക്കോർഡ് ജേതാവ് ദേവസ്യ ദേവഗിരി, ചാത്തമംഗലം വൈസ് പ്രസിഡന്റ് സുഷ്മ, ആരോഗ്യ വിദ്യാഭ്യാസ സ്റ്റാന്റിംഗ് കമ്മറ്റി ചെയർമാൻ ചന്ദ്രൻ തിരുവലത്ത്, ചിത്രകാരൻ സിഗ്നി ദേവരാജ് എന്നിവർ സംസാരിച്ചു. ഉപജില്ല വിദ്യാഭ്യാസ ഓഫീസർ കെ ജെ പോൾ സ്വാഗതവും എച്ച് എം ഫോറം ട്രഷറർ യൂസഫ് സിദ്ധീഖ് എം നന്ദിയും പറഞ്ഞു. തുടർന്ന് ബിജു കാവിലിന്റെ നേതൃത്വത്തിൽ കുട്ടികളുടെ സർഗ്ഗ സംവാദം പരിപാടിയും അരങ്ങേറി
Post a Comment