ഏഷ്യ കപ്പ്​: വീണ്ടും ഇന്ത്യ-പാകിസ്താൻ മത്സരം

ദുബൈ: ഹോങ്​കോങ്ങിനെതിരെ പാകിസ്താൻ 155 റൺസിന്‍റെ വമ്പൻ ജയം നേടിയതോടെ ഏഷ്യ കപ്പിൽ വീണ്ടും ഇന്ത്യ-പാകിസ്താൻ മത്സരം. എ ഗ്രൂപ്പിൽ നിന്ന്​ ഇരു ടീമുകളും സൂപ്പർ ഫോറിലെത്തിയതോടെ ഞായറാഴ്ചയാണ്​ വീണ്ടും ഇന്ത്യ-പാക്​ പോരിന്​ വേദിയൊരുങ്ങുന്നത്​. ദുബൈ അന്താരാഷ്ട്ര സ്​റ്റേഡിയത്തിൽ വൈകുന്നേരം ആറിനാണ്​​ (ഇന്ത്യൻ സമയം 7.30) മത്സരം.

 വെള്ളിയാഴ്ച ഷാർജയിൽ നടന്ന നിർണായക മത്സരത്തിൽ ബാറ്റിങ്ങിലും ​ബൗളിങ്ങിലും ഹോങ്​കോങ്ങിനെ തല്ലിത്തകർത്താണ്​ പാകിസ്താൻ വിജയിച്ചത്​. ടോസ്​ നഷ്ടപ്പെട്ട്​ ബാറ്റിങ്ങിനിറങ്ങിയ പാകിസ്താൻ 20 ഓവറിൽ രണ്ട്​ വിക്കറ്റ്​ മാത്രം നഷ്ടപ്പെടുത്തി 193 റൺസെടുത്തു. ഇന്ത്യ-ഹോങ്​കോങ്​ മത്സരത്തിന്‍റെ അതേശൈലിയിൽ മുന്നേറിയ മത്സരത്തിൽ ആദ്യ ​പത്തോവറിൽ 64 റൺസായിരുന്നു പാകിസ്തന്‍റെ സാമ്പാദ്യം. എന്നാൽ, രണ്ടാം പകുതിയിൽ മുഹമ്മദ്​ റിസ്​വാനും (57 പന്തിൽ 78), ഫഖർ സമാനും (41 പന്തിൽ 53), ഖുഷ്​ദി ഷായും (15 പന്തിൽ 35) അടിച്ച്​ തകർത്തതോടെ പാകിസ്താൻ 193ൽ എത്തി. ഈ ഏഷ്യ കപ്പിലെ ഏറ്റവും ഉയർന്ന സ്​കോറാണിത്​. മറുപടി ബാറ്റിങിനിറങ്ങിയ ഹോങ്​കോങ്​ ചീട്ടുകൊട്ടാരം പോലെ തകർന്നു. വിക്കറ്റ്​ നഷ്ടമാകാതെ 16 എന്ന നിലയിൽ നിന്ന്​ 38ന്​ എല്ലാവരും പുറത്തായി. എട്ട്​ റൺസിന്​ നാല്​ വിക്കറ്റെടുത്ത ഷദബ്​ ഖാനും അഞ്ച്​ റൺസിന്​ മൂന്ന്​ വിക്കറ്റെടുത്ത മുഹമ്മദ്​ നവാസും ഏഴ്​ റൺസിന്​ രണ്ട്​ പേരെ പുറത്താക്കിയ നസീം ഷായുമാണ്​ ഹോങ്​കോങിനെ തകർത്തത്​. എക്സ്​ട്രാ ഇനത്തിൽ കിട്ടിയ 10 റൺസാണ്​ ഹോങ്​കോങിന്‍റെ ടോപ്​ സ്​കോറർ.